Toshkent shahar transport va yo‘l-transport infratuzilmasini rivojlantirish bosh boshqarmasida “Toshshahartransxizmat” AJ qoshidagi Idoralararo tezkor shtab a’zolari raisligida Bosh boshqarma hamda “Toshshahartransxizmat” AJ rahbar va mutaxassislari ishtirokida yig‘ilish o‘tkazildi.

Majlisda Shota Rustavelli ko‘chasida olib borilayotgan keng ko‘lamli rekonstruksiya ishlari yakuniga yetkazilgach:

-jamoat transporti avtobus yo‘nalishlari harakatini qayta tashkil etish,

-yo‘nalishlarni muvofiqlashtirish va yo‘lovchilar oqimini teng taqsimlash,

-barcha harakat ishtirokchilari uchun xavfsiz va qulay sharoit yaratish masalalari muhokama qilindi.

Yig‘ilish davomida nafaqat avtobus yo‘nalishlari, balki piyodalar yo‘laklari, velosiped yo‘llari hamda to‘xtash joylari kabi infratuzilma elementlarini samarali ishlatish, transport oqimini tartibga solish va zamonaviy shahar talablari darajasida xizmat ko‘rsatishni ta’minlash yuzasidan ham ko‘rsatmalar berildi.

• Mutasaddilar tomonidan rekonstruksiya ishlari tugagach, avtobuslar harakat jadvalini optimallashtirish, tirbandliklarning oldini olish va aholiga tezkor hamda xavfsiz transport xizmatini taqdim etish bo‘yicha aniq choralar ishlab chiqilishi belgilandi.
• Mazkur qarorlar poytaxt yo‘llarida transport qatnovini samarali tashkil etish, yo‘lovchilar uchun qulaylik yaratish va eng asosiysi, harakat xavfsizligini ta’minlashga xizmat qiladi.

Ma’lumot uchun:
Sh. Rustaveli ko‘chasini rekonstruksiya qilish natijalariga ko‘ra:

• avtomobillar harakatlanadigan 10 ta yo‘lakdan 6 tasi avtomobillar uchun, o‘rtadagi 2 ta yo‘lak avtobuslar uchun, qolgan 2 ta yo‘lak esa yo‘l bo‘yi to‘xtash joylari uchun ajratiladi;
• 11 ta avtobus bekati, 500 ga yaqin yo‘l bo‘yi to‘xtash joylari, velosiped yo‘laklari, 21 ta piyoda va velosiped o‘tish joylari tashkil qilinadi;
• ko‘chaning o‘tkazuvchanlik quvvati oshiriladi, avtobus qatnovi 40% ga (2 069 tadan 2 868 tagacha), yo‘lovchilar soni 2 barobarga (150 mingdan 300 minggacha) oshadi;
• avtobus harakati vaqti 32% ga qisqaradi (25 daqiqadan 18 daqiqaga), o‘rtacha tezlik 18,5 km/soatdan 23,6 km/soatga ko‘tariladi;
• avtobuslar harakati oraliq intervali 7 daqiqagacha qisqaradi.

Yo‘lovchilarga eslatma:
Rekonstruksiya ishlari yakuniga yetkazilgach, yangilangan transport yo‘nalishlari va to‘xtash joylari haqida qo‘shimcha axborot rasmiy kanallar orqali e’lon qilinadi.

Hurmat bilan,
Toshkent shahar transport va yo‘l-transport infratuzilmasini rivojlantirish bosh boshqarmasi